Temperaturat e larta nuk i ndalën që të dalin edhe këtë të martë në protestë.
Ndonëse në numër të vogël, qytetarët serbë vazhduan protestën nën hijen e tendave para objektit të Komunës së Leposaviqit.
E objekti brenda e jashtë po ruhej nga forcat e KFOR-it.
Madje nga dritaret e komunës ushtarët amerikan kontrollonin gjendjen.
Ndërkohë kreu i kësaj komune Lulzim Hetemi, emëroi katër serbë në drejtori përkatëse.
Lajmin e bëri të ditur, ministri i Administrimit dhe Pushtetit Lokal, Elbert Krasniqi, pas një takimi që pati me ministrin për Komunitete e Kthim Nenad Rashiq.
“E informova për krijimin e mundësive për qytetarët nga komuniteti serb si dhe biseduam edhe për inkuadrimin e serbëve lokal në qeverisjen lokale me ç’rast e informova për vendimin e fundit të Kryetarit të Komunës së Leposaviqit, Lulzim Hetemit për emërimin e katër drejtorëve të tjerë. Violeta Sakic, Nikola Radomirovic, Nenad Radosavljevic dhe Miroslav Minic do të jenë pjesë e kabinetit të Kryetarit Hetemi”, ka shkruar ai në Facebook.
Protesta e serbëve vazhdoi edhe në Zveçan. Madje në këtë komunë, edhe gjatë së martës numri ishte më i madh i protestuesve që po qëndronin në afërsi të ndërtesës komunale.
Por për sigurinë, po përkujdesej KFOR-i turk.
E para objektit të kësaj komune ishte vendosur njësite të Policisë së Kosovës.
Megjithatë, situata edhe këtu monitorohej nga ushtarët e KFOR-it.
Nga data 29 maj, qytetarët serbë po protestojnë para ndërtesave komunale, për të kundërshtuar kryetarët e rinj shqiptarë.