Për më shumë se pesë orë, në këtë gjykatore u lëshuan audio incizime nga ana e prokurorisë.
Me dëgjimin e provave materiale, ka vazhduar gjykimi i ish kryeshefit të Komisionit të Pavarur për Media, Luan Latifi, i akuzuar për korrupsion.
Në këto audio incizime u dëgjuan bisedat në disa takime të Latifit me njërin nga pronarët e kompanisë, Telkos, Elhami Haziri dhe ish-drejtorin e Administratës dhe Financave në KPM-së, Arben Bilalli.
Disa pjesë inkriminuese të Latifit, prokurorja e rastit, më pas i citoi para trupit gjykues.
Citimet e prokurores, nxitën reagime nga avokatët, si të palës së akuzuar, ashtu edhe asaj të dëmtuar.
Madje avokati i Latifit, ishte më i ashpër në reagim, duke iu bashkuar edhe vet Latifi.
Trupi gjykues kërkoi disa herë nga prokurorja që të precizonte pjesët e audio incizimeve, por që e njëjta insistonte që ato të dëgjohen në tërësi, pa shkëputje.
Aktakuza e ngritur më 15 shtator 2021, ngarkon Luan Latifin se në cilësinë e kryeshefit të Komisionit të Pavarur për Media dhe Arben Bilalli, në cilësinë e drejtorit të Administratës dhe Financave në KPM, gjatë qershorit 2021, kishin kërkuar dhe marrë ryshfet shumën prej 8 mijë euro nga i dëmtuari Elhami Haziri, pronar i kompanisë “Telkos”. Ky i fundit, për paratë që i kishte dhënë Bilallit, paraprakisht e kishte njoftuar policinë, për të dëshmuar rastin e korrupsionit, për të cilin edhe po zhvillohet seanca.
Kronika e gazetares Florijeta Dernjani.