Ekipet e Policisë së Kosovës kanë vazhduar me ofrimin e sigurisë në fshatin Banjskë të Zveçanit. Përveç kësaj ata vazhduan të enjten edhe kërkimet në malet skaj fshatit për të gjetur armatim, që besohet se është lënë nga grupi terrorist që vrau rreshterin Afrim Bunjaku mesnatën e 24 shtatorit.
12 ditë pas sulmit terrorist në Banjskë, vendi ku u vra rreshteri Afrim Bunjaku, ka marrë pamje tjetër.
Kamionët që ishin vendosur këtu në natën kritike, u larguan mesditën e së enjtes.
Shumë pranë vendit, po vazhdon qëndrimi i Njësive elite të Policisë së Kosovës.
Derisa, ekipet e forenzikës të ardhura nga Prishtina, ende po merren me gjurmët në vendngjarje.
Kurse banorët po vazhdojnë jetën normalisht pas ngjarjeve të 24 shtatorit.
Fshati turistik e me pak banorë po kontrollohet në çdo cep të saj.
Qëndrimet statike dhe ato në lëvizje të ekipeve policore u panë përgjatë gjithë ditës.
Përveç kësaj ata kanë edhe një punë tjetër.
Më të shumtë në numër dhe të stacionuar për të ofruar siguri, u panë edhe në afërsi të pikës kufitare në Jarinje.
Këtu, lëvizjet ishin të shpeshta dhe kushdo që kalon po kontrollohet në detaje nga Policia e Kosovës.
Por, hyrja nga Serbia për në territorin e Kosovës ende nuk po lejohet të bëhet përmes kësaj pike kufitare.
Arton Rama