Pas përfundimit të punimeve të Konferencës së III-të Ekonomike, e cila u mbajt dje në Preshevë, sot vijoi agjenda me vizitat në bizneset pjesëmarrëse të këtij aktiviteti rajonal.
Në kuadër të kësaj agjende, përfaqësues të Unionit “Vizioni PMB” vizituan Qendrën Tregtare “Interspeed”, një projekt për zhvillimin ekonomik lokal, e vendosur pranë pikës kufitare Tabanoc.
Në njoftimin për media thuhet se “ky investim përfaqëson një shembull konkret të përpjekjeve për forcimin e ekonomisë lokale dhe krijimin e vendeve të reja të punës — fusha ku UAV-PMB gjithmonë ka ofruar mbështetje dhe gatishmëri për bashkëpunim”
Gjatë vizitës, përfaqësuesit e Unionit u pritën Leme Xhema dhe stafi i “Interspeed”, me të cilët zhvilluan një bashkëbisedim mbi mundësitë e bashkëpunimit dhe zhvillimit të mëtejshëm të bizneseve në Preshevë.
Në këtë vizitë mori pjesë edhe kryetarja e Komunës së Preshevës, Ardita Sinani, së bashku me kabinetin e saj. /teve1.info/
