Sulmet ajrore amerikane kanë lënë të vrarë tre persona në provincën Sanaa, në Jemenin qendror, ka njoftuar grupi Huthi.
Televizioni Al-Masirah i drejtuar nga Huthi raportoi se “një person u vra dhe një tjetër u plagos për shkak të agresionit amerikan në distriktin Bani Matar” në provincën Sanaa.
Ai shtoi se “agresioni amerikan shënjestroi rrethin Bani Hashish me tre sulme ajrore dhe distriktin Al-Hosn me dy sulme, të dyja në provincën Sanaa”.
Më herët të shtunën, Al-Masirah raportoi 13 sulme ajrore amerikane në portin dhe aeroportin në Al Hudaydah, pa dhënë detaje.
Presidenti i SHBA Donald Trump urdhëroi në mesin e marsit “aksion ushtarak vendimtar dhe të fuqishëm” kundër grupit ushtarak jemenas, të cilët i ka vendosur në listën e grupeve terroriste, dhe më vonë kërcënoi se do t’i “asgjësonte plotësisht ata”.
Huthi kanë shënjestruar anijet që kalojnë nëpër detet e Kuqe dhe Arabe, ngushticën Bab al-Mandab dhe Gjirin e Adenit që nga nëntori i vitit 2023 në solidaritet me palestinezët në Rripin e Gazës, ku tashmë janë vrarë më shumë se 51,000 persona.
Grupi ndaloi sulmet kur një armëpushim në Gaza u shpall në janar midis Izraelit dhe grupit palestineze, Hamasit, por rifilloi sulmet pasi Izraeli rinovoi sulmet ajrore në enklavë muajin e kaluar.
