Të paktën shtatë persona u vranë pasi Rusia lëshoi një breshëri dronësh në të gjithë Ukrainën gjatë natës të së dielës, sipas zyrtarëve lokalë ukrainas dhe shërbimeve të urgjencës.
Sulmi vjen pikërisht para negociatave të armëpushimit që pritet të mbahen në Arabinë Saudite, ku Ukraina dhe Rusia pritet të mbajnë bisedime indirekte që do ndërmjetësohen nga SHBA të hënën.
Delegacioni ukrainas pritet të takohet me zyrtarë amerikanë në Arabinë Saudite një ditë përpara bisedimeve indirekte, tha presidenti ukrainas Voldoymyr Zelenskyy. Ukraina po planifikon të dërgojë ekipe teknike për të diskutuar detajet e armëpushimit të pjesshëm, ka raportuar AP.
Tre persona, duke përfshirë një fëmijë 5-vjeçar, u vranë dhe 10 të tjerë u plagosën në një sulm me dron në Kiev, tha administrata ushtarake e qytetit.
Tingujt e zgjatur të shpërthimeve u dëgjuan në të gjithë kryeqytetin ukrainas në orët e para, ndërsa sulmi ajror shpërtheu për më shumë se pesë orë. Dronët rusë dhe mbeturinat nga dronët e rrëzuar, të cilët po fluturonin në lartësi më të ulëta për të shmangur mbrojtjen ajrore, ranë mbi ndërtesat e banimit.
Në një deklaratë në mediat sociale, presidenti ukrainas Volodymyr Zelenskyy tha se sulmet si ai në Kiev ishin një dukuri e përditshme për Ukrainën.
Gjithashtu të dielën, Ministria e Mbrojtjes e Rusisë tha se kishte rrëzuar 59 dronë ukrainas gjatë natës, duke përfshirë 29 mbi rajonin e Rostovit dhe 20 të tjerë mbi Astrakhanin jugperëndimor. Në Rostov, një person u vra dhe një makinë mori flakë për shkak të sulmit me dron ukrainas, sipas guvernatorit të përkohshëm të zonës, Yuri Slyusar.
