Çmimet e naftës po vazhdojnë të rriten. Këtë të enjte çmimet arritën në 1 euro e 90 cent për litër.
E pavarësisht kësaj qarkullimi i automjeteve vazhdon të jetë i lartë.
Mirëpo kohëve të fundit po përdoren edhe biçikletat, si dhe trotinetet elektrike.
Krejt kjo për të shmangur shpenzimet por dhe pritjet e gjata nëpër rrugët e stërngarkuara.
“Valla po, kom edhe motorbicikel motor të madh, po bicikla ma mirë, Veç kur shkoj në udhë të lartë, a këtu nëpër Fushë Kosovë me bicikel ma ngat, kallabllak harxhime”, thotë qytetari, Imer Uka.
E disa qytetarë të tjerë po thonë se nëse vazhdon trendi i rritjes së derivateve të naftës, do të detyrohen të mos i përdorin më veturat.
“Nëse bahet 2 euro,po e presmi deri në 2 euro ia mrrijmë, në 2 euro e nalim makinën, une për veti”, thotë Arben Konxheli.
“Veç duhet me lanë te shpija se nuk ka llogari.. Veç duhet me ble ni bicikel se nuk ka llogari”, u shpreh Bujari Krasniqi.
Edhe ekspertët e komunikacionit po parashohin pakësim të automjeteve. Kjo për shkak të kostos së lartë të shpenzimeve.
“Në qoftë se ne përmendim me përqindje, studimet kanë tregu se edhe në nivele tjera sidomos në shtetet që janë në zhvillim e sipër sikurse është edhe Kosova, që nuk e ka një zhvillim ekonomik, atëherë edhe numri i automjeteve do të jetë diku rreth 10 deri 15%, më i vogël në krahasim me numrin e automjeteve derisa ka qenë edhe çmimi i naftës i ulët”, thotë eksperti i komunikacionit, Nol Dedaj.
Trendi i rritjes së çmimit të karburanteve po vazhdon pothuajse çdo ditë, teksa Qeverisë po i kërkohet heqja e akcizës si mundësi për lirimin e naftës dhe biletave për transport.
Kornika e realizuar nga gazetarja Besiana Visoka.