Shiritat e sigurisë, edhe të hënën u panë mbi urën e Liqenit të Ujmanit.
Kjo meqë nga kjo pikë, një qytetar kërceu për t’u larë mesditën e së dielës.
Por i njëjti, nuk arriti të dal më mbi sipërfaqen e ujit.
Për këtë, edhe 24 orë pas ngjarjes tragjike, ekipet po vazhdojnë kërkimet për trupin e pajetë.
Viktima besohet të jetë një 33 vjeçar nga fshati Cerajë i Mitrovicës.
Gjatë gjithë kohës, familjarët e të ndjerit po qëndronin në vendngjarje.
Por, operacioni për gjetjen e trupit të më të dashurit të tyre po del të jetë i vështirë.
Kjo për shkak të thellësisë të Liqenit të Ujmanit.
“Sa i përket terrenit është shumë e vështirë, sepse thellësia arrina deri në 30-50 metra thellësi, nuk është asnjë pjesë e njëjtë. Është pjesë e ngurtë poshtë, nuk na pengon pjesa poshtë por thellësia e madhe. Kërkimet gjatë natës janë të vështira për shkak se dukshmëria është zero. Pajisjet janë të mjaftueshme, solare të cilat vendosen në anije dhe ekipi punon me to”, ka thënë Liridon Ahmeti, kryetari i klubit të zhytjes.
RR.L kishte ardhur për pushime në Kosovë nga shteti i Suedisë.
Për këtë, të hënën këtu u panë edhe zyrtarë nga ambasada suedeze në Kosovë.
Ndërsa gjatë gjithë kohës mbi Ujman, patrullonte edhe Policia e Kosovës.
Këta të fundit, kanë një apel për qytetarët që ditët e nxehta të verës, vendosin t’i kalojnë në këtë liqen.
“Do të dëshironim të bënim një apel, që qytetarët, mërgimtarët sidomos që vijnë këtu, mos ta shohin këtë urë si lartësi të vogël e të mos hidhen nga ky vend. Nga këtu kanë kërcyer profesionistët dhe mbase i kanë parë në televizion dhe për këtë arsye dikush e merr guximin të hidhet nga këtu”, ka thënë Veton Elshani.
Afër familjarëve të hënën, qëndroi edhe i pari i Zubin Potokut, Izmir Zeqiri.
“Është një dhimbje për të gjithë neve, ekipet janë duke u përpjekur në vazhdimësi për ta gjetur trupin dhe jemi këtu për t’i përcjell ekipet dhe për të marrë informacionet rreth detajeve të fundit që po zhvillohen këtu”, ka thënë Zeqiri.
Kërkimet për trupin e pajetë të RR.L, do të vazhdojnë edhe në mbrëmjen e së hënës.
