Në korrikun e vitit 1998 në Rahovec, forcat serbe kryen një masakër ku vranë mbi 40 persona.
Në vendin e njohur si Përzhina i cili ndodhët afër varrezave të qytetit, i groposen kufomat duke tentuar që të fshehin krimin që kishin bërë.
Por në këtë lokacion, pas me shumë se 27 vite, të mërkurën u rikthyen gërmimet nga Instituti Mjekësisë Ligjore e Komisioni Qeveritar për Personat e Zhdukur.
Të premten ata edhe gjetën mbetjet trupore edhe të personit të dytë i cili dyshohet të jetë në mesin e personave të zhdukur gjatë luftës.
E numri i tyre ka gjasa që të rritet.
“Ky është një lokacion që është punuar në të kaluarën nga Tribunali i Hagës nga ekipet e UNMIK-ut, por duke iu falënderuar punës analitike të Kryqit të Kuq Ndërkombëtar dhe institucioneve tona është ardhë në përfundim që një numër i viktimave, personave të zhdukur, ka mundësi që janë ende të varrosur këtu sepse nuk janë zhvarrosur gjatë punimeve në të kaluarën. Ky numër është deri në tetë, nuk mund ta saktësojmë, mund të jetë edhe më i vogël por maksimum mund të jetë tetë”, deklaroi Ditor Haliti nga IML-ja.
E në këtë lokacion, edhe sipas Komisionit Qeveritar për Personat e Zhdukur ishin bërë disa herë gërmime.
“Në kemi konkluduar që jo të gjithë mbetjet mortore të viktimave janë arritur të zhvarrosur gjatë këtyre proceseve të gërmimeve, fillimisht po flasim për verën e vitit 1999, në ditët e para aps luftës kur ekipet gjermane kanë qenë këtu, një gërmim i cili ka pasuar, nga ekipet mjeko ligjore të aminidtratës apo të UNMIK-ut në vitin 2002 dhe së fundmi kanë qenë 2007, dhe në të gjitha këto nuk ka arritur të trajtohet e gjithë hapësira”, tha Kushtrim Gara nga KQPZh.
Kërkesën për hetime në këtë lokacion e ka bërë Prokuroria Speciale.
“Me datën 17 dhjetor hetuesit e drejtorisë për hetime e krimeve të luftës, përkatësisht, sektori i personave të zhdukur, kanë filluar të zbatojnë urdhëresën e Gjykatës Themelore në Prishtinë, Departamenti Special, pas kërkesës së Prokurorisë Speciale, për zhvarroje me qëllim nëse në lokacionin e varrezave masive ka mbetje eshtrore”.
E pas gjetjes së këtyre mbetjeve mortore, përfaqësuesit e familjarëve të zhdukur gjatë luftës janë shprehur të emocionuar.
“Çdo lajm që i vije familjarëve është një shpresë, është diçka e mirë në të gjithë atë tragjedi. Në të njëjtën kohë është një plagë të cilat i kemi që 26 viteve”, tha Selami Hoti, përfaqësues i familjarëve të të zhdukurve.
Gjatë vitit 2025 janë bërë gërmime në 32 lokacione të ndryshme, ku janë gjetur mbi 20 trupa të cilët pritet edhe të identifikohen.
