Autori: Jona Kelmendi
Mes vapës së mesditës, tymi dhe flakët u panë sërish në kodrat e fshatit Tërllobuq të Vushtrrisë.
Një vatër e mbetur nga zjarri i mbrëmshëm ishte riaktivizuar serish këtë të hënë, duke përfshirë zonën malore pranë disa shtëpive dhe duke krijuar kështu rrezik për banorët.
E vetëm pak minuta më pas, zjarrfikësit u panë në vendngjarje duke nisur shuarjen e flakëve dhe duke penguar përhapjen e tyre drejt zonës së banuar.
Banorët shprehin shqetësim për rrezikun nga zjarri dhe përhapjen e tij
“Zjarri ka fillu prej një fshati tjetër nuk e dim prej ku e ka burimin fmija mkan thirr prej largu kur dola e pash qe ish dhez zjarri po ksajde neve na lidhin malet edhe mali është tu depertu naper mal këtu afer e kem shtëpinë na.Frika ekziston gjithkund mas forti qeto erërat kur po fryn munden me qu edhe ma larg zjarrin edhe me na përfshi edhe neve”, është shprehur një banorë.
“Normal tjetër gjo nuk ka mujt me pas ktu, kjo është dikush që po i bën këto gjëra me vetëdije se pa vetëdije nuk e kish bo po faktikisht kto me vetëdije po behen”, ka thënë banori tjetër.
Megjithatë komandanti i zjarrfikësve njofton se ekipet po punojnë maksimalisht për të ndalur përhapjen e zjarreve në kushte të vështira.
“Çdo lajm për zjarr ne ju përgjigjemi me kapacitetet dhe mundësitë aq sa i kem na qe mendoj se jem tu e bo të pamundshmën dhe maksimumin me iu dal këtyre zjarreve duke i marrë parasysh temperaturat e larta që janë tu mbretëru ditëve të fundit dhe jemi duke ia dal”, ka thënë Fadil Hyseni.
E në anën tjetër kryetari i komunës thekson se zjarrvëniet e qëllimshme po shkaktojnë dëme të mëdha dhe po rrezikojnë jetë njerëzish.
“Në shumicën e rasteve po dihet që këtu i ka vënë dora e njeriut kjo papërgjegjësi nuk ka ndodhë kurr në këtë masë me shkatërru ekonomitë tona me i shkatërru pyjet tona edhe me e rreziku dmth edhe jeten e njërzve veqanerisht të zjarrfikësve edhe të popullates civile dmth për një papjekuri të them kështu”, është shprehur Ferit Idrizi.
E vetëm gjatë dites së diel në Vushtrri kanë qenë 21 vatra aktive të cilat sipas Komandantit të Zjarrëfikësve janë lokalizuar në kohë.
