Njerëz të shumtë janë mbledhur të premten në shkollën “Beqir Gashi” në Mleqan të Malishevës.
Këtu po bëhen homazhet e fundit tek trupi i Sabedin Kryeziut, eshtrat e të cilit u gjetën 26 vite pas luftës, në fshatin Kralan të Gjakovës.
Që prej përfundimit të luftës, për fatin e Sabedin Kryeziut nuk dihej asgjë.
Familjarët e pikëlluar, i ngushëlluan një numër i madh i njerëzve të cilët morën pjesë.
Në ceremoni u pa edhe kryetari i komunës, Ekrem Kastrati, i cili tha se e premtja është ditë mërzie për gjithë Malishevën.
“Malisheva edhe më tutje po edhe Kosova më tutje vuan lirinë e saj të shtrenjtë ngavet fakti që tashmë i kemi identifikuar tri kufoma përkatësisht tre persona të zhdukur, një në Mleqan dhe dy në Bubavec dhe tjetri në fshatin Llapqevë prandaj ky sot është i pari që po e varrosim dhe eshtrat e të ndjerit pushojnë në vendin e tij të lindjes”, tha Kastrati.
Sabedin Kryeziu nuk është i pagjeturi i fundit i kësaj komune.
Kryetari i Shoqatës së të Zhdukurve në Malishevë, Hysen Kryeziu, tha se nga lufta e fundit u mungojnë edhe shumë të tjerë.
“Dy të tjerët do të rivarrosen me datën të cilën janë kidnapuar në Kralan, me datë 4 prill 1999… Në Komunën tonë aktualisht i kemi 38 persona të pagjetur, shpresojmë dhe në bazë të të dhënave kemi diçka sinjale positive rreth identifikimeve por mbetet me u pa shpresojmë që të gjinden edhe ata sa më shpejt”, tha Kryeziu.
E pas homazheve, Kryeziu u përcoll për në varrezat e fshatit.
Me ceremoni fetare, eshtrat e tij u varrosën në vendlindje, ku u thanë edhe disa fjalë për të.
Në fillim të muajit prill, do të varrosen edhe tri viktima tjera, eshtrat e të cilëve u gjetën nga lufta e fundit në Kosovë.
