Bashkimi Evropian shpreson që puna për dialogun ndërmjet Beogradit dhe Prishtinës do të rifillojë shumë shpejt dhe do të ketë përparim.
Komisioneri për Zgjerim dhe Fqinjësinë në Bashkimit Evropian, Oliver Varhelyi, tha sot në Tiranë se vetëm nëpërmjet dialogut që promovohet nga BE-ja do të ketë një zgjidhje afatgjate për Kosovën.
“Për këtë na duhet që të gjithë të jenë në tryezë me një frymë konstruktive dhe që të ketë ecuri. Pa nisjen e dialogut do të jetë shumë e vështirë që të ecet përpara dhe që të flasim më vonë për çështje shumë më të gjera si për shembull rrugëtimi i Kosovës drejt BE-së”, ka theksuar Varhelyi.
Ai ka shtuar se BE shpreson që Kosova më në fund të mbyll çështjet e hapura me Serbinë dhe të investojë në të ardhmen e saj.
“Prandaj edhe për Kosovën ne në tryezë kemi vendosur një paketë shumë të madhe ekonomike dhe sociale dhe duam që të ecim sa më shpejtë që të jetë e mundur përpara”, ka sqaruar Varhelyi.
Thirrjen për vazhdimin e dialogut midis Kosovës dhe Serbisë e ka mbështetur edhe Kryeministri Edi Rama.
Ai u shpreh se të gjitha vendet që kanë kontribuuar për pavarësinë e Kosovës po bëjnë thirrje për vazhdimin e dialogut dhe për arritjen e një marrëveshje përfundimtare midis dy vendeve.
Në këtë konferencë Rama u pyet nëse Shqipëria duhet apo jo të ndahet nga Maqedonia e Veriut nëse negociatat për anëtarësim në BE nuk kanë përparim.
Megjithatë, shtoi Rama, Shqipëria nuk do të kërkojë për momentin të ndahet nga Maqedonia e Veriut, por nëse pas qershorit nuk hapen negociatat, atëherë do të rishikohet vendimi.
Raporti i gazetarit Bashkim Bekolli.
