Komisioni për Zgjerim dhe Fqinjësi të Mirë në BE, Oliver Varhelyi, ka thënë se është keqkuptuar pasi u raportua se i kishte quajtur “idiotë” deputetët e Parlamentit Evropian, gjatë një seance plenare.
Varhelyi tha se ai po bisedonte me shefin e kabinetit të tij për një çështje krejtësisht të ndryshme, transmeton teve1.info.
“Kjo lidhej me një bisedë private dhe të vazhdueshme në hungarisht mes meje dhe shefit të kabinetit tim për një çështje krejtësisht të ndryshme, e cila ishte nxjerrë jashtë kontekstit”, ka thënë hungarezi.
Varhelyi ka thënë se i respekton plotësisht të gjitha institucionet e BE-së, përfshirë Parlamentin Evropian dhe deputetët e tij.
“Dëshiroj t’i falënderoj të nderuarit deputetë të Parlamentit Evropian për shkëmbimin e pikëpamjeve të djeshme që ishte një mundësi e shkëlqyer për të diskutuar çështje gjeopolitike me rëndësi të madhe në Ballkanin Perëndimor”, ka thënë Varhelyi.
Ndryshe mediat raportuan se pas fjalës së tij në parlament, Varhelyi kishte harruar ta çkyçte mikrofonin dhe i kishte quajtur “idiotë” deputetët e PE-së.
“Sa idiotë të tjerë ka ende (në listën e folësve)?” raportohet të ketë thënë ai në hungarisht.
