Drejtoresha e Kulturës, Rinisë dhe Sportit në Komunën e Mitrovicës, Valdete Idrizi, ka njoftuar se ka dhënë dorëheqje nga pozita e saj.
Përmes një postimi në Facebook, ajo ka thënë se një ditë më parë ka kërkuar nga kryetari i komunës, Bedri Hamza që ta lirojë nga detyra, për arsye personale.
“Ditën e djeshme, i kam kërkuar kryetarit Bedri Hamza të më liroj nga detyra e Drejtoreshës së Kulturës, Rinisë dhe Sportit! Kjo kërkesë shtrohet për arsye personale e familjare!”, ka shkruar Idrizi.
Ajo ka shkruar se dy vite të punës së saj kanë qenë të jashtëzakonshme.
“Për mua, këto dy vite kanë qenë me të vërtetë të jashtëzakonshme, ndaj për këtë mundësi e falënderova së pari, kryetarin tonë, Bedri Hamza!”, shkroi ajo.
Ajo ka përmendur edhe projektet e realizuara gjatë kohës sa ka qenë në këtë detyrë.
“Gjatë kësaj kohe, së bashku me ekipin dhe me komunitetin sportiv e artistik, shoqërinë civile e mediat, kemi punuar fort që Mitrovicës tonë t’ja kthejmë gjallërinë dhe shkëlqimin e munguar, si qytet i sportit, kulturës e traditës. Shumë festivale, qindra aktivitete të larmishme e që mblodhën të rinjtë e të rejat, po edhe gjeneratat e mesme dhe të shtyera, na bënë të punojmë edhe më shumë për Mitrovicën tonë”, ka shkruar Idrizi./teve1.info/
