Në selinë e UEFA-së në Nion te Zvicrës është bërë tërheqja e shortit për kualifikimet e grupmoshave U-17 dhe U-19 vjeç në konkurrencën e vajzave.
Vashat e Kosovës U17 arritën të promovohen në Ligën A të kualifikimeve për Euro 2023, si ekipa me bilancin me të mirë nga pozitat e dyta, dhe do të bëjë pjesë në Grupin 5 teksa në të njëjtin grup janë të përfshira edhe Republika e Irlandës, Franca e Italia.
Ndeshjet e këtij grupi do të zhvillohen në Francë, më 23, 26 dhe 29 mars, 2023. Liga A përbëhet nga 28 ekipe. Shtatë fituesit eventual të grupeve do të kualifikohen në Kampionatin Evropian, i cili mbahet në Estoni. Skuadrat që përfundojnë në vendin e katërt në grupe do të bien në Ligën B për raundin e parë kualifikues të edicionit 2023/24.
Ndërkohë, Kombëtarja U19 do të marrë pjesë në kualifikimet e Ligës B për Euro 2023, ku është përfshirë në Grupin 3, së bashku me Irlandën e Veriut, Qipron dhe Letoninë. Ndeshjet e këtij grupi do të zhvillohen më 4, 7 dhe 10 prill, 2023 në Irlandën e Veriut. Fituesit e secilit grup dhe skuadra me bilancin më të mirë nga pozitat e dyta, do të promovohen në Ligën A për t’i vazhduar më pas kualifikimet drejt Evropianit 2023.
