Sipas njoftimit të ASK-së, në disa produkte ka pas edhe rënie të çmimeve ndërsa inflacioni i përgjithshëm për muajin gusht në raport me muajin e njëjtë të vitit 2021 ka arritur në 13 për qind.
“Indeksi i tërësishëm i harmonizuar i çmimeve të konsumit është më i lartë në një mesatare prej 13.0% në muajin gusht 2022, krahasuar me muajin gusht 2021. Kjo kryesisht është shpjeguar me ngritjen e çmimeve të konsumit në këtë periudhë te nëngrupet e COICOP-it: vajra dhe yndyra ushqimore (52.1%); lëndë djegëse të ngurta, dru zjarri, pelet etj. (48.6%); bukë dhe drithëra (32.4%); karburante dhe lubrifikantë për pajisjet e transportit personal (32.0%); qumësht, djathë dhe vezë (26.2%); gaz (26.1%); mish (22.5%); sheqer, reçel, mjaltë, çokollata dhe ëmbëlsira (19.7%)”,thuhet në komunikatë.
Sipas njoftimit të Agjencisë së Statistikave të Kosovës, rritje të çmimeve ka pas edhe në shërbime të transportit, ku është regjistruar 17.9 për qind rritje e çmimit, shërbime hoteliere 14.9%, blerje e automjeteve me 5.3% si dhe duhani me 5.3%.
Ndërsa, rënie e çmimeve sipas ASK-së, vërehet te nëngrupet e COICOP-it: karburante dhe lubrifikantë për pajisjet e transportit personal me -6.1%, me një ndikim prej -0.4 për qind.