Palestinezët mbajtën funeralet të hënën për 15 mjekë dhe reagues të urgjencës të vrarë nga ushtria izraelite në Gazën jugore, pasi që trupat e tyre dhe ambulancat e dëmtuara u gjetën të varrosura në një varr masiv të improvizuar dhe me sa duket të lëruar nga buldozerët ushtarakë izraelitë.
Gjysmëhëna e Kuqe Palestineze thotë se punëtorët e vrarë dhe automjetet e tyre ishin të shënuara qartë si personel mjekësor dhe humanitar dhe akuzoi trupat izraelite për vrasjen e tyre “me gjakftohtësi”.
Ushtria izraelite thotë se trupat e saj hapën zjarr ndaj automjeteve që iu afruan atyre “në mënyrë të dyshimtë” pa identifikim, raporton AP.
Të vdekurit përfshinin tetë punëtorë të Gjysmëhënës së Kuqe, gjashtë anëtarë të njësisë së urgjencës së Mbrojtjes Civile të Gazës dhe një punonjës nga UNRËA, agjencia e OKB-së për palestinezët.
Kryqi i Kuq Ndërkombëtar/Gjysmëhëna e Kuqe tha se ishte sulmi më vdekjeprurës ndaj personelit të saj në tetë vjet.
Që nga fillimi i luftës në Gaza 18 muaj më parë, Izraeli ka vrarë më shumë se 100 punonjës të Mbrojtjes Civile dhe më shumë se 1000 punonjës shëndetësorë, sipas OKB-së.
