Ushtarët italianë dhe kroatë, pjesë e Komandës Rajonale Perëndimore (RC-W) të KFOR-it, kanë zhvilluar një stërvitje të rëndësishme me zjarr të drejtpërdrejtë në poligonin e qitjes “Voloire”, pranë Kampit Villaggio Italia, për të ruajtur dhe përmirësuar aftësitë e tyre të të shtënave.
Në njoftimin për media është bërë e ditur se kjo stërvitje është një pjesë e programit të rregullt të KFOR-it për të siguruar gatishmërinë dhe profesionalizmin e trupave, si dhe për të përforcuar procedurat e testimit dhe operacionet ushtarake.
“KFOR-i vazhdon të kryejë ushtrime të tilla për të mbajtur një nivel të lartë të gatishmërisë dhe për të kontribuar në një mjedis të sigurt për qytetarët e Kosovës. Ky angazhim është në përputhje me mandatin e përcaktuar nga Rezoluta 1244 e Këshillit të Sigurimit të OKB-së, e cila parashikon sigurimin e paqes dhe stabilitetit në territorin kosovar”, thuhet në njoftim.
