Gjykata Themelore në Prishtinë, me urdhër të Prokurorisë Speciale ka lëshuar fletëarrest për 10 persona të dyshuar për sulmin e 24-shtatorit në Banjskë të Zveçanit. E arrestimi i tyre nga Serbia, po shihet si jo i mundur nga njohësit e sigurisë.
Përmes rrugëve ilegale, hynë në territorin e Kosovës.
Një grup paraushtarak serb, më 24 shtator në fshatin Banjskë të Zveçanit, sulmuan Policinë e Kosovës ku mbeti i vrarë rreshteri i Policisë, Afrim Bunjaku dhe u plagos një tjetër.
E Gjykata Themelore e Prishtinës me urdhër të Prokurorisë Speciale, ka lëshuar urdhërarrest për dhjetë persona të përfshirë në grupin terrorist serb.
Radak Axhiq, Millosh Milenkoviq, Gjorgje Balloviq, Danillo Virijeviq, Millosh Kragovic, dhe Millan Nedelkoviq, të gjithë nga Mitrovica e Veriut, tashmë janë të kërkuar nga institucionet e Drejtësisë në Kosovë.
Por njohësit e sigurisë, e vlerësojnë kërcënim për vendim mosarrestimin e terroristëve serb të cilët ende janë të lirë. Profesori Fatmir Çollaku thotë se Serbia nuk do t’i arrestojë këta persona.
“Parimisht nuk kisha me besu që mund të arrestohen në rastin konkret mund të bëhet ndonjë përjashtim meqë jemi të vetëdijshëm për presion të jashtëzakonshëm ndërkombëtar te Serbia dhe mund, të ndodh por në parim nuk besoj.. Serbia din të taktizoj, për të dalë para Bashkimit Evropian kinse është për shtet ligjor, është për bashkëpunim ndërkombëtar, për të bërë arrestimin e të dyshuarve për të cilët ka bazë juridike”, tha njohësi i sigurisë, Fatmir Çollaku.
Sipas tij, mosarrestimi i tyre, cenon sigurinë e Republikës së Kosovës.
“Të gjithë atyre dhe të ngjashmëve të njësive paramilitare të cilët janë me ngarkesë të madhe ideologjike ultra nacionaliste të dëgjuar dhe përbetuar të Beogradit, paraqet kërcënim paraqet rrezik megjithëse rreziku nuk është në atë masë sa mund të atakohet siguria nacionale”, është shprehur Çollaku.
Ndërsa, njohësi tjetër i sigurisë, Drizan Shala vlerëson se faktori ndërkombëtar duhet të bëjë më shumë presion ndaj Serbisë.
E zëvendësdrejtori i Policisë së Kosovës për rajonin e veriut, Veton Elshani, në një përgjigje për televizionin ka thënë se sapo të mësohet zyrtarisht vendodhja e të dyshuarve për sulmin në Banjskë, ata do të arrestohen.
Faktori ndërkombëtar vazhdimisht i ka bërë thirrje Serbisë, për të bashkëpunuar me institucionet e Kosovës dhe ato ndërkombëtare, që grupi të del para drejtësisë dhe të marrë dënimin e merituar.
