Sigal Prishtina ka mbetur pa kryetrajner një ditë para ndeshjes derbi me Trepçën. Të martën, trajneri nga Lituania, Zydrunas Urbonas, është larguar nga Prishtina. Këtë e kanë konfirmuar drejtues të klubit të basketbollit.
Urbonas ishte në krye të Prishtinës prej fillimit të edicionit. Por skuadra nuk kishte rezultatet e pritura, ndërsa telashet me fondin e lojtarëve ishin të mëdha. Ka pasur ndërrime të shumta të lojtarëve, ndërsa Prishtina është ankuar edhe për palestër, që ishte për një kohë në renovim.
Prishtina në Superligë ka pesë fitore e katër humbje. Në fundjavë humbi me 20 pikë dallim nga Ylli në Suharekë. Ndërkohë javën e kaluar humbi edhe nga Lovqeni i Cetinjes në Ligën Ballkanike.
Prishtina të mërkurën prej 19:00 e luan derbin me Trepçën. Kjo ndeshje e shtyrë e xhiros së nëntë zhvillohet në palestrën “1 Tetori”, për shkak se palestra në Pallatin e Rinisë është e zënë me ndeshje të futsallit.
Prishtinën në ndeshjen ndaj Trepçës do ta drejtojë Albert Sylejmani, që ishte ndihmës i Urbonasit. Në fakt Sylejmani do të jetë trajner i përkohshëm i Prishtinës.
