Kandidati për kryetar të Prishtinës nga Partia Demokratike e Kosovës (PDK), Uran Ismaili, ka zhvilluar sot një takim me komunitetin e motoristëve të kryeqytetit, ku është diskutuar për mënyrat se si Prishtina mund të bëhet një vend më i përshtatshëm dhe më i sigurt për ta.
Ismaili, i cili vetë është motorist, tha se qyteti duhet të jetë i hapur për të gjithë, pavarësisht mjetit të transportit që përdorin.
Ai theksoi se pasioni i motoristëve duhet respektuar, por njëkohësisht duhet ruajtur edhe qetësia dhe rendi publik.
“Prishtina duhet t’u japë hapësirë të gjithëve — edhe motoristëve. Gjatë mandatit tim do të krijojmë pista të dedikuara për motorë dhe motokros, në mënyrë që ky pasion të zhvillohet në mënyrë të sigurt e të kontrolluar”, deklaroi Ismaili.
Ai shtoi se problemi i zhurmës së motorëve është një çështje që kërkon zgjidhje të balancuar, duke respektuar si komunitetin e motoristëve ashtu edhe qytetarët që kërkojnë qetësi në hapësirat urbane.
“Zhurma e motorëve është kthyer në shqetësim për shumë banorë. Ne do të zbatojmë rregullore të qarta, në përputhje me standardet e Bashkimit Evropian, për të parandaluar zhurmat e panevojshme, pa kufizuar lirinë e atyre që kanë pasionin për motoçiklizëm”, tha ai.
Kjo nismë, sipas Ismailit, është pjesë e vizionit të tij për një Prishtinë më të organizuar, më të sigurt dhe më gjithëpërfshirëse, ku secili grup qytetarësh gjen vendin e vet.
