Kryetari i Komunës së Klinës, Zenun Elezaj, ka vizituar zonën e Gjurgjevikut për të parë nga afër dëmet e shkaktuara nga përmbytjet e fundit.
Nga inspektimi dhe fotografitë e publikuara, shihet se ura në Gjurgjevik është dëmtuar, ndërsa për sigurinë e qytetarëve janë vendosur shiritat paralajmërues.
Elezaj bëri të ditur se kompania e kontraktuar nga komuna ka nisur punimet për sanimin e dëmeve:
“Sot në mëngjes, bashkë me Drejtorin e Shërbimeve Publike dhe Emergjente, Qendrim Millaku, dhe Shefin e Kabinetit, Shemsi Bajraktari, vizituam zonat e përmbytura dhe inspektuam nga afër objektet më të rëndësishme, si urat dhe rrugët e dëmtuara. Pamë gjendjen reale në terren dhe fillimin e punimeve për riparimin e dëmeve. Kompania e kontraktuar është në terren dhe po ndërmerr të gjitha masat e nevojshme për riparimin e pronave publike”, tha Elezaj.
Qëllimi i vizitës ishte të sigurohet nga afër se punimet për rikthimin e infrastrukturës publike po kryhen sipas planit, dhe se qytetarët mund të lëvizin në siguri deri në përfundimin e riparimeve.
