Universiteti i Prishtinës ka shpërblyer ekipin e fakultetit juridik me nga 2 mijë euro që u renditën në treshen më të mirë botërore në garën botërore të drejtësisë.
Rektori i UP-së, Qerim Qerimi dhe kryesuesi i Këshillit Drejtues, Altin Sahiti në këtë rast i shprehën falënderime ekipit për përfaqësimin dinjitoz.
“Ky rezultat në shumë drejtime është i pamatshëm dhe çfarëdo shpërblimi për të, ka gjasë të mos e reflektojë vlerën reale të punës dhe të rezultatit. Megjithatë, krahas mirënjohjeve, Universiteti ka ndarë edhe shpërblimin financiar në vlerën 2000 euro për secilin anëtar dhe trajner të ekipit për këtë arritje të jashtëzakonshme, duke u renditur në treshen më të mirë nga qindra universitete pjesëmarrëse nga e mbarë bota”, thuhet në njoftimin e UP-së në Facebook. /teve1.info/
