Tetë persona janë arrestuar pas bastisjeve që ka kryer Policia e Kosovës sot në veri.
Ministri i Brendshëm, Xhelal Sveçla, ka njoftuar se bastisjet janë kryer në 10 lokacione të ndryshme, ndërsa të arrestuarit dyshohen për lidhje dhe nxitje të sulmeve të fundit në veri.
“Kontrolli i realizuar në bashkëpunim me organet e drejtësisë, AKI-në kanë rezultuar me konfiskimin e një arsenali të armëve dhe municionit e pajisjeve të ndryshme, përfshirë emblema e qindra uniforma, të cilat do të shërbejnë si dëshmi relevante për bandat kriminale”, tha ai në konferencë për media.
Ndërsa, drejtori i Policisë, Gazmend Hoxha, ka thënë se tri sulmet e fundit në veri janë kualifikuar si “sulme terroriste” që kanë pasur synim ta cenojnë sigurinë e Kosovës
Ai gjithashtu ka thënë se të arrestuarit mund të kenë lidhje me kryeterroristin Milan Radoiçiq.
Drejtori i Policisë tregoi se gjatë bastisjeve të sotme kanë konfiskuar mbi 200 uniforma ushtarake, 6 zolla, 3 granata dore, 2 armë AK47, 1 revole, municion të kalibrave të ndryshëm, fitila ndezës për inicim të lëndëve plasëse, helmeta ushtarake, maska, thika, para dhe pajisje të tjera.
Ndërsa në një bastisje të ndarë në Zveçan, Policia ka konfiskuar sasi të konsiderueshme armatimi, 2 AK47, 3 revole, 1 armë gjuetie, 2 armë rekreative, 6 karikator të AK47, municion e uniforma ushtarake.
