Komandanti i Forcave Paqëruajtëse të NATO-s në Kosovë (KFOR), Gjeneral Major Ozkan Ulutash, ka pritur sot në takim përfaqësuesin ushtarak të Britanisë së Madhe në NATO, Gjeneral-lejtnant Sir Ian Cave.
Gjatë takimit, të dy gjeneralët diskutuan për situatën aktuale të sigurisë në Kosovë dhe më gjerë në rajon, duke vënë theksin në rolin e vazhdueshëm të KFOR-it për ruajtjen e paqes dhe stabilitetit.
“Gjeneral Ulutash shprehu vlerësimin e tij për mbështetjen e vazhdueshme dhe të vlefshme të Mbretërisë së Bashkuar në ruajtjen e një mjedisi të sigurt për të gjithë njerëzit në Kosovë”, thuhet në një komunikatë të KFOR-it pas takimit.
Në takim u theksua gjithashtu rëndësia e dialogut politik konstruktiv ndërmjet palëve dhe mbështetja që KFOR-i ofron për zhvillimin e tij në një ambient të sigurt.
“KFOR mbetet i përkushtuar për të kontribuar në stabilitetin rajonal dhe për të përkrahur institucionet në Kosovë në përputhje me mandatin e saj nga Kombet e Bashkuara”, theksohet më tej në njoftim.
