Ish-ambasadori, Sylë Ukshini ka deklaruar se problemet mes Kosovës dhe Serbi dhe në Ballkan janë problem i sigurisë.
Në një intervistë në emisionin “Ditari” në Tëvë1, Ukshini tha se Banjska e ka treguar që Kosova ka të bëjë me një Serbi që provon ta destabilizojë rajonin.
Derisa, ai tha se Beogradi ka prodhuar dhunë, luftë, krime dhe spastrime.
“Problemet në Ballkan dhe problemet Kosovë – Serbi është problem i sigurisë, Banjska e ka treguar se në kemi të bëjmë me një Serbi që provon ta destabilizojë rajonin. Beogradi ka prodhua dhunë, lufta, krime dhe spastrime”, ka deklaruar Ukshini.
Sipas Ukshinit, vizita e Emisarit evropian për dialog, Peter Sorensen javën e ardhshme në Kosovë nuk do të lëvizë diçka konkrete.
Ai thotë se Sorensen nuk e ka sentimentin anti-Kosovë, që sipas tij e ka pasur ish- emisari për dialog Kosovë – Serbi, Mirosllav Lajçak.
Ish-ambasadori thotë se gjërat duhet të ndryshohen në përmbajtje nga BE, ku thotë se BE-ja Kosovën e trajton si “qasje neutrale”
“Nuk do të lëvizë diçka konkrete vizita e Sorensenit në Kosovë, por unë mendoj që Peter Sorensen përkundër eksperiencës së madhe që ka dhe nuk e ka atë sentimentin anti-Kosovë si e ka pasur Lajçak, unë mendoj që nuk do të arrijë përpara deri sa vetë Bashkimi Evropian nuk ndryshon. BE, Palestinën e trajton si shtet ndërkaq Kosovën e trajton si me qasjen neutrale. Gjërat duhet të ndërrohen edhe nga BE në përmbajtje. Unë mendoj që qasja e BE-së është e gabuar dhe mbi të gjitha për të pasur sukses dialogu i Peter Sorensen, unë mendoj që 5 vendet e BE-së duhet të lëvizin mbi bazën e opinionit të GjND-së”, tha ai ndër të tjera./teve1.info/
