Kështu ka bërë të ditur Ihor Zhovkva, nënkryetar i Zyrës së Presidentit ukrainas Volodymyr Zelensky.
Presidentja e Komisionit Evropian, Ursula von der Leyen gjatë vizitës së saj më 8 prill në Kiev ia ka dorëzuar pytësorin Zelenskyt, duke u zotuar që sa më shpejtë të dalin me ofertë për Ukrainën në mënyrë që të bëhet pjesë e BE-së.
“Sot mund të them se dokumenti është kompletuar nga pala ukrainase. Ne presim që rekomandimi të jetë pozitiv dhe atëherë topi do të jetë në anën e vendeve anëtare të BE-së”, ka thënë Zhovkva të dielën mbrëma për transmetuesin publik ukrainas.
Ai thotë se Ukraina pret të marrë statusin e vendit kandidat për anëtarësim në BE gjatë qershorit në një takim që është planifikuar të mbahet në Këshillin Evropian.
KE-ja do të zhvillojë takimin rreth datave 23-24 qershor, sipas planit të Këshillit të publikuar në faqen zyrtare të tij.
“Më pas do të na duhet të fillojmë bisedimet e pranimit. Dhe pasi t’i zhvillojmë ato bisedime, mund të flasim për anëtarësimin e plotë të Ukrainës në BE”, ka përfunduar Zhovkva.
