Një oficer i rangut të lartë i ngarkuar me Trupat e Mbrojtjes Bërthamore, Biologjike dhe Kimike të Rusisë (RKhBZ) është vrarë në një shpërthim në Moskë, tha Komiteti Hetues i Rusisë.
Gjenerallejtënant Igor Kirillov dhe ndihmësi i tij u vranë nga një bombë e fshehur në një skuter jashtë hyrjes së një ndërtese në Moskë herët më 17 dhjetor, tha komiteti në një deklaratë, duke shtuar se kanë nisur hetimet lidhur me rastin.
Shpërthimi ishte rezultat i një operacioni special të shërbimit të sigurisë SBU të Ukrainës, tha një burim në SBU për Radion Evropa e Lirë.
Kirillov është oficeri ushtarak rus i nivelit më të lartë që është vrarë në atë që duket të jetë një atentat që nga fillimi i pushtimit të plotë të Rusisë në Ukrainë në shkurt 2022.
SBU-ja tha se forcat ruse përdorën armë kimike pothuajse 5.000 herë gjatë luftës në Ukrainë nën udhëheqjen e Kirillovit.
Pretendimi nuk mund të verifikohej në mënyrë të pavarur, por Kievi thuhet se qëndron pas një fushate të vrasjeve që patën shënjestër zyrtarë dhe oficerë rusë ushtarakë, të përfshirë në pushtimin e Ukrainës.
Shpërthimi ndodhi një ditë pasi shërbimi i sigurisë SBU i Ukrainës raportoi se prokurorët ukrainas ngritën një akuzë kundër Kirillovit, si përgjegjës për përdorimin e armëve kimike kundër trupave ukrainase gjatë luftës së nisur nga pushtimi i paprovokuar i Ukrainës nga Rusia.
Kirillov është njëri nga disa oficerë rusë dhe figura pro luftës që u vranë në Rusi dhe në pjesët e pushtuara nga Rusia të Ukrainës.
Vdekja e tij ndodhi një javë pasi një zyrtar i lartë i një kompanie ruse që prodhon raketa lundruese të përdorura nga Moska në luftë, thuhet se u qëllua për vdekje jashtë kryeqytetit.
Kirillov u shfaq në pamjet që ishin thelbësore për një hulumtim të Shërbimit Rus të Radios Evropa e Lirë, i cili zbuloi detaje në lidhje me një objekt jashtë Moskës, që sipas pohimit të SHBA-së tregon se Rusia mban një program sulmues me armë biologjike në kundërshtim me Konventën e OKB-së për Armët Biologjike.
Hulumtimi u fokusua në pamjet e medias shtetërore ruse që tregonin ministrin e atëhershëm të Mbrojtjes, Sergei Shoigu, duke inspektuar objektin, i cili ishte i njohur për rolin e tij në programin e armëve biologjike të Bashkimit Sovjetik që është zgjeruar në masë të madhe.
Kirillov udhëhoqi Shoigun në turneun e tij në inspektimin e objektit të quajtur Instituti i 48-të Qendror i Kërkimeve Shkencore.
Komiteti hetimor tha se shpërthimi që vrau Kirillovin ndodhi jashtë një pallati në Ryazansky Prospekt, një rrugë në kryeqytetin rus që fillon rreth 7 kilometra në juglindje të Kremlinit.
Fotot e postuara në kanalin rus Telegram Astra tregonin dy trupa të shtrirë në dëborë jashtë derës së dëmtuar të një ndërtese apartamentesh.
Pas analizimit të imazheve të një makine të parkuar pranë ndërtesës së banesës, Astra raportoi se automjeti ishte i Kirillovit.
RKhBZ janë forca speciale që veprojnë në kushte të kontaminimit radioaktiv, kimik dhe biologjik.
Sipas biografisë së tij zyrtare, Kirillov mori pjesë në krijimin dhe miratimin e sistemit të flakëhedhësve të rëndë TOS-2 Tosochka nga ushtria ruse, si dhe në luftën kundër pandemisë COVID-19.
Kirillov dhe RKhBZ-ja u vendosën në listën e sanksioneve të Britanisë në tetor për përdorimin e agjentëve të kontrollit të trazirave dhe raporteve të shumta për përdorimin e agjentit toksik vdekjeprurës, kloropicrin, në fushën e betejës.
Kirillov dhe forcat e tij ishin “përgjegjëse për ndihmën në vendosjen e këtyre armëve barbare”, tha Britania në atë kohë.
Kremlini i ka quajtur akuzat “të pabaza”.
Kirillov, i cili sipas agjencisë shtetërore ruse të lajmeve, TASS, ishte i diplomuar në Shkollën e Komandës së Lartë Ushtarake të Mbrojtjes Kimike në Kostroma, ishte emëruar në krye të RKhBZ-së në prill të vitit 2017.
Më parë ai kishte shërbyer në Drejtorinë e shefit të Trupave të Mbrojtjes Kimike, Biologjike dhe nga Rrezatimi.
