Rusia akuzoi Ukrainën të dielën për kryerjen e sulmeve me dronë që shkaktuan zjarr në një central bërthamor në rajonin e saj perëndimor Kursk gjatë natës, ndërsa Ukraina festoi 34 vjetorin e pavarësisë së saj.
Zyrtarët rusë thanë se disa objekte energjetike u shënjestruan në sulmet e natës. Zjarri në objektin bërthamor u shua shpejt pa u raportuar për të lënduar, sipas shërbimit për shtyp të uzinës në Telegram.
Ndërsa sulmi dëmtoi një transformator, nivelet e rrezatimit mbetën brenda kufijve normalë, raporton Associated Press.
Organizata mbikëqyrëse bërthamore e Kombeve të Bashkuara tha se ishte në dijeni të raporteve të medias se një transformator në centrale ishte përfshirë nga flakët “për shkak të aktivitetit ushtarak”, por nuk kishte marrë konfirmim të pavarur.
Ajo tha se drejtori i përgjithshëm i saj, Rafael Mariano Grossi, tha se “çdo strukturë bërthamore duhet të mbrohet në çdo kohë”.
Ukraina nuk komentoi menjëherë mbi sulmin e dyshuar.
Zjarrfikësit iu përgjigjën gjithashtu një zjarri në portin e Ust-Lugës në rajonin e Leningradit të Rusisë, ku ndodhet një terminal i madh i eksportit të karburantit.
Guvernatori rajonal tha se afërsisht 10 dronë ukrainas u rrëzuan, me mbeturina që ndezën zjarrin.
Ministria e Mbrojtjes e Rusisë pretendoi se mbrojtja e saj ajrore ka kapur 95 dronë ukrainas mbi territorin rus gjatë natës së të dielës.
