Presidenti ukrainas, Volodymyr Zelensky ka thënë se Ukraina është e gatshme të vazhdojë një armëpushim që ndalon sulmet në infrastrukturën energjetike, në përputhje me marrëveshjen që u ndërmjetësua nga Shtetet e Bashkuara gjatë tre ditëve të negociatave me zyrtarë ukrainas dhe rusë në Riad.
Zelensky ka thënë se Ukraina ka rënë dakord me negociatorët amerikanë “që një armëpushim për infrastrukturën energjetike mund të fillojë sot”.
Por, ai ka paralajmëruar se çdo goditje ndaj objekteve energjetike të Ukrainës nga Moska do të përballet me “hakmarrje të fortë”, raporton AP.
Komentet pasuan marrëveshjet e dobëta që dolën nga negociatat tre-ditore mes SHBA-Ukrainë dhe SHBA-Rusi në kryeqytetin saudit.
Shtëpia e Bardhë të martën ka dhënë deklaratë duke thënë se palët “kishin rënë dakord të sigurojnë lundrim të sigurt, të eliminojnë përdorimin e forcës dhe të parandalojnë përdorimin e anijeve tregtare për qëllime ushtarake në Detin e Zi”.
Pasi Shtëpia e Bardhë lëshoi deklaratën e saj të martën, Kremlini paralajmëroi se një marrëveshje e mundshme e Detit të Zi mund të zbatohet vetëm pasi të hiqen sanksionet kundër Bankës Ruse Bujqësore dhe organizatave të tjera financiare të përfshira në tregtinë e ushqimeve dhe plehrave dhe të sigurohet aksesi i tyre në sistemin SWIFT të pagesave ndërkombëtare.
Në një referencë të dukshme ndaj kërkesave të Moskës, Shtëpia e Bardhë tha të martën se SHBA “do të ndihmojë në rivendosjen e aksesit të Rusisë në tregun botëror për eksportet bujqësore dhe plehërore, uljen e kostove të sigurimit detar dhe rritjen e aksesit në portet dhe sistemet e pagesave për transaksione të tilla”.
