Zyrtarë të lartë ukrainas kanë thënë të mërkuren se Ukraina është e gatshme të nënshkruajë një marrëveshje që do i jepte SHBA-së akses në mineralet e saj të çmuara dhe të rralla me shpresën për të siguruar mvështetjen e vazhdueshme amerikane për mbrojtjen kundër Rusisë.
Ministrja e ekonomisë e Ukrainës, Yulia Svyrydenko, ishte në Uashington të mërkurën për të ndihmuar në hartimin e aspekteve teknike të marrëveshjes, sipas dy zyrtarëve të lartë ukrainas që folën në kushte anonimiteti sepse nuk ishin të autorizuar ta diskutonin çështjen publikisht, shkruan AP.
Për Ukrainën, marrëveshja shihet si çelësi për të siguruar aksesin e saj në ndihmën ushtarake amerikane në të ardhmen.
Presidenti i SHBA-së, Donald Trump, tregoi në shkurt se donte qasje në materialet e rralla të tokës së Ukrainës si kusht për vazhdimin e mbështetjes së SHBA-së në luftë.
Por, nuk ishte menjëherë e qartë nëse administrata Trump ishte gjithashtu e gatshme të finalizonte marrëveshjen të mërkurën, raporton AP.
SHBA-të po kërkojnë qasje në më shumë se 20 lëndë të para që konsiderohen strategjikisht kritike për interesat e tyre, duke përfshirë depozitat e titanit në Ukrainë , i cili përdoret për prodhimin e krahëve të avionëve dhe prodhime të tjera hapësinore, dhe uraniumit, i cili përdoret për energjinë bërthamore, pajisjet mjekësore dhe armët.
Ukraina gjithashtu ka litium, një përbërës kyç në disa teknologji baterish, si dhe grafit dhe mangan, të cilët përdoren në bateritë e automjeteve elektrike.
Trump më parë e përshkroi një marrëveshje të propozuar për mineralet si rimbursim për miliarda dollarë ndihmë që SHBA-të i kanë dhënë Ukrainës.
Kabineti ukrainas pritet të miratojë tekstin e marrëveshjes përpara se ajo të nënshkruhet në Uashington, pas së cilës ajo do të nënshkruhet nga Svyrydenko. Marrëveshja më pas do të duhet të ratifikohet nga Parlamenti ukrainas përpara se të hyjë në fuqi.
