Presidenti ukrainas, Volodymyr Zelensky ka deklaruar se është i gatshëm të heq dorë nga kërkesa për anëtarësim në NATO, në këmbim të garancive të sigurisë nga SHBA-ja dhe Evropa.
Zelensky ka dhënë këtë njoftim pak para bisedimeve të paqes që do mbahen në Berlin të dielën, ku do të diskutohet plani i Shtëpisë së Bardhë për t’i dhënë fund pushtimit rus, ka njoftuar gazeta Financial Times.
Rusia e ka vendosur vijë të kuqe anëtarësimin e Ukrainës në Organizatë, dhe prej kohësh ka kërkuar që aleanca transatlantike të zotohet të ndalojë zgjerimin e saj drejt lindjes si kusht për t’i dhënë fund luftës.
Presidenti ukrainas u ka thënë gazetarëve para nisjes në Berlin se Ukraina ende kërkon garanci sigurie nga SHBA-ja dhe Evropa.
“Po flasim për garanci dypalëshe sigurie midis Ukrainës dhe Shteteve të Bashkuara – domethënë, garanci të ngjashme me Nenin 5… si dhe garanci sigurie për ne nga partnerët tanë evropianë dhe nga vende të tjera si Kanadaja, Japonia dhe të tjera”, u ka thënë Zelenskyy gazetarëve në një bisedë në WhatsApp.
“Dhe ky është tashmë një kompromis nga ana jonë.”
Zelensky ka deklaruar se Ukraina ende nuk ka marrë përgjigjje nga Uashingtoni për propozimet e rishikuara të dërguara më parë nga Kievi, pas konsultimeve me udhëheqësit evropianë.
Këshilltari i Putinit, Yuri Ushakov ka deklaruar se Kremlini nuk do të pranojë sugjerimet evropiane dhe ukrainase për planin pasi sipas tyre, ata nuk janë të interesuar për paqe dhe mbajnë anën e luftës.
“Nuk është se do të ketë ndonjë gjë të mirë atje”, tha Ushakov në komentet e transmetuara në televizionin shtetëror të dielën.
Zelensky ka kundërshtuar fuqishëm mundësinë e heqjes dorë nga territori ukrainas tashmë i pushtuar nga Rusia, duke thënë se një gjë e tillë do të binte në kundërshtim me ligjin ukrainas dhe atë ndërkombëtar.
Kancelari gjerman Friedrich Merz do të zhvillojë bisedime me zyrtarë të tjerë evropianë të sigurisë të dielën në mbrëmje, përpara negociatave me Zelenskyy-n, delegacionin amerikan dhe udhëheqësit evropianë të hënën.
Evropa po përpiqet të rifitojë ndikimin mbi bisedimet e Ukrainës, nga të cilat blloku është lënë kryesisht jashtë loje.
