Rusia dhe Ukraina njoftuan të mërkurën se kanë kryer një tjetër shkëmbim të robërve të luftës, pavarësisht tensioneve që lindën nga rrëzimi i një avioni transporti ushtarak rus javën e kaluar.
Ministria e Mbrojtjes së Rusisë tha se të dy vendet kishin shkëmbyer 195 robër lufte respektivisht, dhe se robërit rusë do të dërgoheshin në Moskë për të marrë trajtim mjekësor dhe psikologjik.
“Më 31 janar, si rezultat i procesit të negociatave, 195 ushtarë rusë robër që ishin në rrezik për jetën u kthyen nga territori i kontrolluar nga regjimi i Kievit”, thuhet në një deklaratë të ministrisë ruse të mbrojtjes. “Në këmbim, u dorëzuan saktësisht 195 të burgosur ukrainas lufte”.
Pas publikimit të deklaratës, Presidenti ukrainas Volodymyr Zelenskyy shkroi në rrjetin X se ishin liruar 207 ushtarë ukrainas. Ai vuri në dukje se ky ishte shkëmbimi i 50-të që nga fillimi i luftës gati 2 vjet më parë, duke e çuar në 3,035 numrin e të burgosurve ukrainas të riatdhesuar.
Nuk ka patur shpjegime lidhur me shifrat e ndryshme të raportuara nga të dy palët, raporton VOA.
Presidenti rus, Vladimir Putin, tha se Moska është e hapur për më shumë shkëmbime dhe se Kievi gjithashtu ka treguar se është i hapur. Ministria e Mbrojtjes së Rusisë u citua nga agjencia shtetërore e lajmeve RIA të ketë thënë se Emiratet e Bashkuara Arabe (EBA) ndihmuan në ndërmjetësimin e shkëmbimit.
Shkëmbimi vjen pasi një aeroplan transporti ushtarak u rrëzua javën e kaluar me 65 të burgosur ukrainas në bord, sipas ministrisë ruse të mbrojtjes. Moska pretendon se avioni u rrëzua pas goditjes nga një raketë tokë-ajër e lëshuar nga forcat ukrainase.
Kievi nuk e ka mohuar plotësisht variantin e Moskës, duke konfirmuar planifikimin e një tjetër shkëmbimi të burgosurve, por që ishte anuluar. Kievi vuri gjithashtu në pikëpyetje pohimet ruse për të burgosurit ukrainas në bordin e avionit të rrëzuar. Sipas Moskës, të 74 personat në bord u vranë.
