Analisti politik, Fidan Ukaj duke komentuar heqjen e vizave për serbët e Kosovës që kanë pasaporta të Serbisë, ka thënë se ky vendim e inkurajon shtetin serb që të krijojë probleme në atë kosovar.
Sipas Ukajt, pas këtij vendimi, Serbia përmes disa qytetarëve që i përdorë si marioneta do të krijojë probleme për mos pajisje më dokumente të Kosovës.
Ndërsa, ai thekson që të gjithë ata serb qytetarë të Republikës së Kosovës që mbajnë pasaportë të Serbisë, janë pjesë e politikës së Vuçiqit.
“Ky vendim e inkurajon Serbinë me i shty qytetarët serbë që i ka si marioneta për të krijuar probleme në Republikën e Kosovës që mos me u pajis me dokumenta të Republikës së Kosovës. Të gjithë ata qytetarë të cilët mendojnë ta mbajnë këtë pasaportë atëherë i bie që janë pjesë e politikës së Vuçiqit dhe marioneta të grupeve paralele kriminale që financohen nga Serbia dhe përdorën për të destabilizuar Kosovën”, është shprehur ai në emisionin “Ditari” në TËVË 1.
Më tej, Ukaj thotë se qeveria e Kosovës nuk ka përgjegjësi për këtë vendim, pasi vendimi është marrë nga BE.
Analisti sheh vetëm neglizhencë të institucioneve të vendit që ta argumentojnë se pse dhënia e vizave në këtë formë, jep mundësi për paraqitjen e një precedenti që Serbia do ta përdorë për ta mbajtur të ngrirë konfliktin me Kosovën.
“Këto pasaporta nuk janë lëshuar vetëm në kohën e qeverisjes së Lëvizjes Vetëvendosje, lëshohen ka moti kohë. Nuk është vendim i institucioneve është i Bashkimi Evropian. Nuk ka qenë në mundësitë tona me ndalu këtë vendim. I vetmi gabim ose e vetmja neglizhencë e institucioneve të Kosovës është një diplomaci më dinamike sa i përket argumentimit përballë vendeve kyçe të Bashkimit Evropian. Mendoj që ka munguar një punë e ministrisë, që nëse do të ketë një vendim në favor të këtyre pasaportave atëherë do të krijohet një precedent i cili do të përdoret nga Serbia për ta mbajtur të ngrirë këtë konflikt”, ka shtuar ai. /tëvë 1.info.
