Politologu, Fidan Ukaj, duke folur për dialogun Kosovë – Serbi dhe qasjen e Bashkimit Evropian ndaj të dyja palëve për çështjen e Asociacionit është shprehur skeptik se kjo çështje do të përmbyllet pa propozimin e palës ndërkombëtare.
Ai tha se pret që Bashkësia Ndërkombëtare do ta sjellë një draft të Asociacionit të komunave me shumicë serbe.
“Në fakt ka qenë instistim i palës serbe tashmë në pjesën e marrëveshjes që e kemi si pikë kryesore formimin e këtij Asociacioni të Komunave me Shumicë Serbe, dhe unë jam skeptik që palët do të gjejnë një dakordim rreth një statuti të mundshëm. Unë mendoj qe prap do të jetë Bashkësia Ndërkombëtare ajo e cila do të prezantojë një draft. Unë besoj se prap do të jetë Bashkësia Ndërkombëtare e cila do ta ofrojë një statut për palët dhe do t’i ftojë palët të japin komentet e tyre ashtu siç i ka ftuar të japin komentet për marrëveshjen e cila u dakordua më 27 shkurt, e cila në fakt ishte merre ose lëre. Dhe unë mendoj se njëjtë do të ndodhë edhe sa i përket Asociacionit, Bashkësia Ndërkombëtare do ta sjellë një draft të saj dhe do t’i ftojë palët t’i ofrojnë komentet e tyre dhe në fund besoj që do të jetë merre ose lëre edhe sa i përket Asiociacionit. Për arsye se ne i shohim palët të jenë larg… “, tha Ukaj në emisionin “Ditari” në Tëvë1.
Tutje ai shtoi se ka dallime të theksuara në draft vizionin dhe draft statutin e propozuar nga pala serbe për të cilin Ukaj tha se përbrenda tij ishtë formimi i një Republike Srbska në Kosovë.
“Pala ndërkombëtare duke e parë që palët nuk do të kenë një përafrim nuk do të kenë një dakordim për pikat… Ne nëse i bëjmë krahasimin mes draft vizionit dhe draft statutit të prezantuar nga pala serbe tani nëse mund të themi ashtu, edhe pse ata kanë qenë të mandatuar nga Rakiçi i cili ka qenë pjesë e institucioneve të Kosovës janë diametralisht të kundërta dhe shifet qartë se aty është një Republikë Sërbska e cila do të formohej në të ardhmen”, tha ai.
Kurse ditë më parë zëdhënësi i Qeverisë së Kosovës, Përparim Kryeziu në Tëvë1 tha se nuk janë në dijeni nëse ka një draft të propozuar nga Bashkimi Evropian dhe Shtetet e Bashkuara të Amerikës.
“Unë nuk kam dijeni për drafte të tillë, por edhe një herë po them, Kosova është palë në këtë proces, përveç se e barabartë edhe aktive duke e dhënë kontributin në çdo takim, përmes propozimeve të saj, të cilat asnjëherë nuk kanë munguar dhe do të vazhdojë të jetë e tillë”, tha ai./teve1.info./