Shtëpia e Futbollit Evropian – UEFA, ka reaguar në lidhje me rastin e penalltisë së Julian Alvarezit pasi Atletico Madridi kërkoi sqarim.
Alvarezit iu anulua penalltia kundër Real Madridit, të mërkurën mbrëma pasi lojtari preku topin me dy këmbët.
Alvarezi ka rrëshqitur gjatë goditjes nga pika e bardhë dhe VAR-i ka konfirmuar se ai ka prekur topin me dy këmbët, gjë që nuk lejohet.
Në sqarim, UEFA ka shkruar: “Edhe pse kontakti ishte minimal, lojtari e ka prekur topin (me këmbën e majtë) para se të gjuante (me të djathtën). Sipas rregullores, VAR duhej t’i sinjalizonte gjyqtarit që goli të anulohej. UEFA do të hyjë në diskutime me FIFA-n për të rishikuar këtë rregullore, kur prekja e dyfishtë është qartësisht e paqëllimshme”.
Atletico Madridi, të mërkurën mbrëma u eliminua nga Real Madridi në 1/8 e finales të Ligës së Kampionëve pas penalltive.
