Vitet e studimit po i finalizojnë në një ngjarje të përbashkët. E për këtë janë veshur solemnisht.
Mbi 500 studentë absolventë të disa programeve të UBT-së u prezantuan në një ceremoni që u mbajt të shtunën në sallën “1 Tetori” në kryeqytet.
Për ta pati një mesazh rektori Edmond Hajrizi.
“Prej këtij momenti ju jeni edhe dhënës, ju jeni edhe kontribuues. Ju duhet të merrni përgjegjësi. Tani kurrkush nuk aksepton që ju nuk jeni përgjegjës që Kosova të jetë më mirë, që Kosova të zhvillohet më mirë”, thotë ai.
Kurse vet studentët u shprehën të kënaqur me cilësinë e studimeve në këtë kolegj dhe me mundësitë që iu ofruan.
“Jam mëse e kënaqur si me profesorë ashtu edhe me sistemin se si janë krijuar ligjëratat. Çdo herë na vijnë e-maila të reja ku kërkojnë punëtorë për drejtimet tona”, thotë Medina Rexha, studente e dizajnit të integruar.
“Cilësia e studimeve është e mirë. Ofrohen edhe bursa jashtë shtetit. Shumica e studentëve në gjeneratën tem nga viti i dytë kanë fillu edhe me vende të punës”, thotë studenti i shkencave kompjuterike, Valon Nuredini.
Për universitetin fjalë të mira pati edhe babai i një vajze të diplomuar.
“Jemi shumë të kënaqur me cilësinë, ashtu siç e ka shpjegu edhe vet Albina gjatë procesit të saj mësimor edukativ”, thotë një prind.
Por cilat janë mundësitë që UBT-ja i ofron për karrierë.
“Trajnime në shkathtësi të buta për studentët aktual që janë veç pjesë e UBT ku më tutje ata trajnohen me këto shkathtësi, më pastaj është ndërlidhja e tregut të punës, ne ndihmojmë në krijimin e komunikimit me industrinë”, bëri të ditur Halil Bashota, drejtor i Qendrës së karrierës në UBT.
Ceremonia e gradimit për studentët tjerë që do të diplomojnë do të organizohet javën tjetër.
Kronika e realizuar nga gazetari Gojart Jashari.