Në muajin korrik, ministri i Bujqësisë, Faton Peci, bashkë me kryeministrin Kurti, njoftuan se është siguruar buka e motmotit. Por, në muajin tetor, Ministria e Industrisë, Ndërmarrësisë dhe Tregtisë hapi tender të rezerva të grurit në vlerë 4 milionë euro.
“Të dhënat nga tereni tregojnë që fatbardhësisht për herë të parë në historinë e pasluftës, ne sigurojmë bukën e motmotit.”
Ishte koha e korje shirjeve dhe kështu kishte njoftuar ministri i Bujqësisë në muajin korrik të këtij viti.
Madje në një korje shirje kishte marrë pjesë edhe kryeministri Kurti, sipas të cilit prodhimi i grurit do ta tejkalon nevojën për import të këtij produkti.
“Ky duket të jetë viti në të cilin me prodhimtarinë e shtuar, prej 12 mijë deri në 150 mijë ton grurë, do ta mbulojmë e tejkalojmë importin që e kemi pasur prej 139 mijë grurë në vitin e kaluar”, ka thënë Kurti.
E hiç më pak se katër muaj më vonë, një tjetër dikaster i Qeverisë shprehu nevojën për mbi 13 ton grurë.
Në kuadër të rezervave shtetërore për vitin 2024, Ministria e Industrisë, Ndërmarrësisë dhe Tregtisë, hapi tender për furnizim me grurë, në vlerë prej 4 milionë euro.
“Departamenti i Reservave Shtetërore të Mallrave ka nevojë për shtim të rezervave shtetërore se grurit ngaqë furnizimi me këtë artikull është me qëllim për t’u siguruar qytetarëve sasitë e domosdoshme në rast të fatkeqësive natyrore apo lufte, dhe destinimi i buxhetit të DRSHM, sipas Programit vjetor të miratuar nga Qeveria”.
Sipas dosjes së tenderit, furnizimi me grurë është në kuadër të Strategjisë dhe Programit vjetor 2024 për krijimin e Rezervave Shtetërore të Mallrave.
Por, si objektiv kryesor i kësaj strategjie është harmonizimi i nevojave për Rezerva Shtetërore të Mallrave me kushtet dhe rrethanat e Republikës së Kosovës, në aspektin financiar dhe atë material.
Televizioni ka dërguar pyetje në ministri, për arsyen e hapjes së këtij tenderi pas proklamimit se është siguruar buka e motmotit, por nuk ka marrë përgjigje.
Kurse nga Shoqata e Mullistëve,Bashkim Zejnullahu thotë se edhe pse ka pasur rritje të rendimentit të grurit, prapë se prapë nuk është mbuluar në tërësi nevoja e konsumatorëve.
“Nuk kemi të dhëna të sakta që me u deklaru 100%, por mendoj se këtë vit kemi qenë me sasi më të mëdhaja edhe mund të përafrohet me kërkesën dhe nevojën që ka Kosova për këtë vit”, ka deklaruar ai.
Vetëm vitin e kaluar, llogaritet të jetë importuar grurë në vlerë mbi 36 milionë euro.
