Nga oxhaku i Kapelës Sistine sërish doli tym i zi paraditen e sotme, duke treguar se as në raundin e dytë dhe as në të tretin të votimit nuk është zgjedhur papa i ri. Bota katolike vazhdon të pres shfaqjen e tymit të bardhë, shenjë se Kisha Katolike ka një udhëheqës të ri shpirtëror.
Pas këtyre raundeve, kardinalët do të kthehen në rezidencat e tyre brenda Vatikanit për drekë dhe më pas do të rikthehen në Kapelën Sistine për dy votime të tjera që mund të zhvillohen pasdite.
Sheshi i Shën Pjetrit mbetet i mbushur me një turmë të larmishme – pelegrinë katolikë, grupe shkollore, turistë nga e gjithë bota dhe qindra gazetarë – të gjithë të mbledhur për të dëshmuar këtë moment historik, raporton AP.
Disa po marrin pjesë në pelegrinazhe të planifikuara për Vitin e Shenjtë, ndërsa të tjerë kanë mbërritur në procesione fetare, të udhëhequr nga kryqe.
Konklava përbëhet nga 133 kardinalë votues që vijnë nga 70 vende të ndryshme. Shumica e tyre janë emëruar nga Papa Françesku i ndjerë, i cili i dha përparësi përfaqësimit global dhe misionit baritor, duke ndryshuar përbërjen tradicionale të Kolegjit të Kardinalëve.
Megjithatë, kjo larmi – veçanërisht gjuhësore – mund të jetë duke ngadalësuar procesin, pasi jo të gjithë kardinalët flasin ose kuptojnë italishten apo latinishten, gjuhët tradicionale të Vatikanit.
Spekulimet vazhdojnë për profilin e papës së ardhshëm. Një kandidat më i ri në moshë mund të sjellë një papati afatgjatë, ndërsa një zgjedhje nga Azia apo Afrika, mund të sinjalizojë një largim nga rrënjët tradicionale evropiane të Vatikanit.
Megjithatë, një ndryshim i tillë mund të përbëjë sfidë për burokracinë italiane ende duke u përshtatur me stilin e pavarur të Papa Françeskut.
Për momentin, sytë vijojnë të jenë të drejtuar nga oxhaku i Kapelës Sistine – në pritje të një reje të bardhë tymi që do të shpallë zgjedhjen e papës së ri.
