Kanë kaluar më shumë se 240 ditë që janë duke punuar këtu.
E pas rreth tetë muajve, punimet në tunelin e Kurrizit në lagjen “Dardania të Prishtinës, gati kanë mbërritur fundin.
Përkundër disa vonesave, hyrjes së projektit në gazën përfundimtare i janë gëzuar banorët e zonës.
“Qysh ka qenë ai tunel që me kalu nuk ke mundur as dy metra, tash e kanë bërë me ventilim me staza në të dy anët e kanë bërë asfaltin e kanë bërë kanalizimin edhe tash prej këtu mundesh me kalu edhe në këmbë në mënyrën më të mirë të mundshme, prandaj është një investim i merituar”, thotë Zymer Maxharri qytetar.
“Jo që ka qenë nevojë, por ka qenë më se e nevojshme se ka qenë tmerr me hy brenda. Punë e madhe është bërë këtu, është dashur të gjitha instalimet me i zhvendos nga lartë poshtë, kanalizimin ujësjellësin e kjo punë jo që është kryer shpejt,por është kryer në mënyrë fenomenale deri në 02:00 kanë punuar asfaltin me vendos”, shprehet Fatmir Bekqeli.
Drejtori i drejtorisë për transformim në kryeqytet, Gëzim Kastrati, jep detaje se si do të duket tuneli pas përfundimit.
“Ky tunel, përveç se ka me shërbye për lëvizje të makinave në një kahje, do të ketë edhe lëvizje të këmbësorëve, lëvizje të biçikletave dhe ka me pas një organizmi dhe funksionalizim shumë më të mirë dhe ka me qenë në shërbim të qytetarëve. Është duke u paraparë edhe një organizimi një tregu i cili punohet nga trevat tona. Parashihet një lokal ku do të funksionoj gjatë verës që Prishtina i ka 6 muaj të mirë e pjesën tjetër të shohim si do të funksionoj në vjeshtë apo në dimër”, tregon Kastrati.
Kastrati e pranon se ka pasur disa vonesa në përfundimin e projektit, mirëpo gjithçka sipas tij do të përfundoj shpejtë.
“Jemi këtu në pjesën e fundit të tunelit, ku ka filluar edhe pjesa finale të finalizohet dhe parashihet që diku në fund të muajit qershor të kemi këtu një manifestim një ngjarje artistike kulturore që ti përurojmë edhe punimet. Kemi pasur shumë ankesa për vonesa, mirëpo vonesat kanë qenë për shkak të kohës dhe asnjëherë për shkak të kompanive apo operatoreve”, thotë ai.
