Eskavatori ka ditë që është ndalur.
Në këtë mënyrë, janë ndalur edhe të gjitha punimet në tunelin e Kurrizit në lagjen “Dardania”.
E kjo pjesë, tani përdoret si parking për vetura.
Ankesa për këtë kanë edhe nga opozita.
Këtë projekt që kap shumën prej 1.3 milionësh, nga Lëvizja Vetëvendosje po e shohin si të dështuar.
“Tashmë janë bërë 5 muaj që kur kanë filluar punimet në tunelin e kurrizit në Dardani dhe gjendja është krejt ndryshe prej asaj çfarë kanë paraqitur kryetari Rama. Ai ka thënë që në qershor të këtij viti kanë për të përfunduar punimet por gjendja faktike në terren qëndron që këtu janë larg punimet”, tha Besart Krasniqi, asamblist nga LVV-ja.
Por nga Komuna e Prishtinës thonë se punimet janë ndalur për shkak të temperaturave të ulëta.
“Prej muajit janar nuk kemi punuar për shkak të temperaturave të ulëta. Tashmë po shihet jemi këtu me një fazë që ku temperatura në mëngjes ishte -7 tani e kemi -2. D.mth edhe mjeshtërit në këtë rast, kompanitë nuk rrezikojnë për me i fut punëtorët e vet në këto temperatura”, tha Gëzim Kastrati, drejtor i transformimit në Komunën e Prishtinës.
Qytetarët që parkojnë veturat brenda tunelit, Kastrati i quan të papërgjegjshëm.
“Edhe para se me fillu kjo gjendje këtu operatorët ose pronarët e bizneseve i kanë parku veturat këtu në pjesën e prapme. Tash me këtë situatë nuk jam duke u pajtuar, se nuk janë duke i respektuar shenjat mirëpo këta janë njerëz të papërgjegjshëm”, tha ai.
Ai tha se deri në fund të muajit maj, i gjithë projekti i paraparë do të jetë i përfunduar.
