Bayern Munchen e nisi furishëm sezonin e ri duke shënuar 11 gola në dy sfidat e para ndaj Leipzigut (5-3) në finalen e Superkupës së Gjermanisë dhe Eintrachtit të Frankfurtit në javën e parë në Bundesliga, por takimet e radhës në kampionat kanë sjellë zhgënjim te tifozët.
Bavarezët nuk fitojnë prej katër ndeshjesh, teksa në fundjavë u mposhtën 1-0 në derbin ndaj Augsburgut, që siguroi pikët maksimale falë rrjetës së Mërgim Berishës. Ekipi i Julian Nagelsmann ka arritur vetëm tre fitore në shtatë javët e pare.
Mediet gjermane flasin për mundësinë e shkarkimit të Nagelsmann, me Thomas Tuchel që është gati të rikthehet në Bundesligë. Gjithsesi, Oliver Kahn i ka dalë në mbrojtje teknikut 35-vjeçar. “Ne nuk po shqyrtojmë asnjë trajner tjetër në këto momente.
Ne jemi plotësisht të bindur për aftësitë e Nagelsmann. Ama, ne duhet të rikthehemi në rrugën e sukseseve”, deklaroi CEO i kampionëve të Gjermanisë, që ndryshe nga kampionati po shkëlqejnë në Champions League, aty ku kanë fituar ndaj Interit dhe Barcelonës.
