Një numër i konsiderueshëm i politikanëve boshnjakë në Bosnjë e Hercegovinë (BeH) e dënuan tubimin në Banja Llukë, duke e përshkruar atë si një provokim.
Anëtari i Presidencës së BeH-së, Denis Beqiroviq tha se presidenti i Serbisë Aleksandar Vuçiq duhet ta dijë se nuk ka koncept të shtetësisë për Republikën Serbe, pasi ky etnitet nuk ka qenë dhe nuk do të jetë kurrë shtet.
Partia e Veprimit Demokratik (SDA) e quajti ardhjen e Vuçiq në Banja Llukë me rastin e Ditës së Shtetësisë Serbe një akt agresioni të hapur dhe sulmin më të hapur ndaj integritetit territorial të BeH deri më tani.
Ministri i Mbrojtjes i BeH-së Zukan Helez tha se Vuçiq mbërriti në Banja Llukë si një refugjat pasi ai nuk kërkohet në asnjë qytet të madh në Serbi, ku mbështetja për protestat e studentëve po rritet.
“Duke shënuar një festë të përbashkët imagjinare të Serbisë dhe entitetit më të vogël boshnjak në shtetin e saj fqinj të Bosnjës dhe Hercegovinës, Vuçiq dëshiron të shkaktojë një krizë në BeH dhe në rajon dhe të largojë vëmendjen, të paktën për një kohë të shkurtër, nga kriza socio-politike në Serbi”, tha Helez.
Ai vlerësoi se nuk ka dallim në politikën e Vuçiq dhe atë të Sllobodan Millosheviqit, përveç se ky i fundit u përpoq ta zgjerojë Serbinë përmes lumit Drina me tanke dhe agresion, ndërsa Vuçiq e bën këtë duke provokuar vazhdimisht kriza.
Kujtojmë, kreu i entitetit Republika Serbe Milorad Dodik, ka pritur sot mikun e tij nga përtej lumit Drina, presidentin serb Aleksandar Vuçiq, në aeroportin në Banja Llukë për të shënuar Sretenjen nën sloganin “Bashkim dhe krenarë”.
Ndonëse nuk është e qartë pse Vuçiq po feston Ditën e Shtetësisë së Serbisë jashtë shtetit të tij, është e padiskutueshme që festimi i “Ditës së shtetësisë së RS” përfaqëson një tjetër tension që rrjedh nga postulatet e ashtuquajturit Kuvend Gjithëserb, të cilat janë në përputhje me aspiratat për shkëputjen e RS nga BeH.
Një tjetër fakt specifik është se ky takim dhe ky përkujtim po zhvillohen në kohën e krizës më të madhe politike që kanë përjetuar në jetën e tyre politike Vuçiq dhe Dodik.
