Gjashtë muajt e parë të këtij viti nuk kanë qenë aq të mirë për Fondin e Kursimeve Pensionale të Kosovës.
Meqë Banka Qendrore e Kosovës përmes një raporti mbi sistemin financiar të Kosovës të botuar më 31 gusht 2022 ka bërë të ditur se rënia e investimeve përgjatë periudhës janar-korrik 2022 ka arritur në 161.7 milionë euro.
Bazuar në këto statistika, opozita konsideron se shteti nuk garanton për kursimet në Trust.
Kësisoj Eliza Hoxha, deputete nga Partia Demokratike e Kosovës thotë se qytetarëve duhet të iu mundësohet tërheqja nga ky trusti.
“D.m.th a po e kuptoni që Shteti nuk garanton për paret e tona në TRUST sepse nuk është fond pensional tamam e më këtë as të drejtën me i ndalë paret tona nuk e ka parimisht – sepse është fond mirëbesimi. Eh …ma mirë t’i kishim marr na paret tona e i kishim qarkullu nëpër Kosovë dhe e kishim ndihmu pak ekonominë vendore e edhe mirëqenien tonë”, tha ajo.
Kjo rënie e investimeve në këtë institucion nuk u prit mirë as nga njohës të fushës.
Ekonomisti Mustafë Kadriaj u shpreh se do ishte më mirë nëse këto para do ishin në duart e qytetarëve.
“Vlera e përgjithshme e aseteve të Fondit të kursimeve pensionale të Kosovës, deri në korrik të këtij viti ka arritur në rreth 2.28 miliardë euro, përderisa vlera e çmimit të aksionit në korrik ka qenë 1.66 €”, tha Kadrijaj.
Kronika e realizuar nga Valëza Sylejmani.