Presidenti amerikan, Donald Trump ka miratuar planet për të sulmuar Iranin, por ende nuk ka marrë një vendim përfundimtar mbi ndërhyrjen ushtarake, raporton CBS.
Një burim i lartë i inteligjencës tha për CBS se Trump është i gatshëm të përmbahet nga nisja e sulmeve nëse Irani pranon të braktisë programin e tij bërthamor.
Sipas raporteve, Trump po shqyrton mundësinë e një sulmi ndaj Fordos, një objekt nëntokësor për pasurimin e uraniumit në Iran. Por deri tani, presidenti amerikan nuk ka dhënë detaje për planet e tij, duke thënë: “Mund ta bëj, mund të mos e bëj.”
Udhëheqësi Suprem i Iranit, Ajatollah Ali Khamenei, hodhi poshtë kërkesën e Trump për dorëzim pa kushte dhe paralajmëroi se çdo ndërhyrje ushtarake amerikane do të ishte me pasoja të rënda.
Në një fjalim të regjistruar, Khamenei tha se “kombi iranian nuk do të dorëzohet” dhe e kritikoi ashpër Trumpin.
Reagimi i Teheranit u pasua nga sulme të reja të ushtrisë izraelite ndaj objektivave bërthamore dhe bazave të raketave në Iran.
Irani njoftoi se ka goditur me raketa hipersonike në përgjigje, ndërsa në Izrael nuk janë raportuar dëme serioze. Këto ishin sulmet e para që nga nisja e ofensivës izraelite në fundjavë.
Misioni i Iranit në Kombet e Bashkuara e kritikoi ashpër Trumpin përmes postimeve në X, duke theksuar se Irani nuk negocion nën presion dhe nuk do të pranojë paqen përmes kërcënimeve. “Asnjë zyrtar iranian nuk do të përulet para portave të Shtëpisë së Bardhë,” shkruhej në postim.
Në kryeqytetin Teheran, qytetarët po bllokojnë rrugët, duke kërkuar strehim nga sulmet izraelite që kanë tronditur qytetin me 10 milionë banorë.
Kryeministri izraelit Benjamin Netanyahu tha në një video se forcat izraelite po “përparojnë hap pas hapi” drejt shkatërrimit të kërcënimeve bërthamore dhe raketore nga Irani.
“Ne kontrollojmë qiellin mbi Teheran dhe po godasim me forcë të jashtëzakonshme regjimin e ajatollahëve,” deklaroi ai.
Ndërkaq, Sekretari amerikan i Mbrojtjes, Pete Hegseth tha para një komisioni të Senatit se Pentagoni është i gatshëm të ekzekutojë çdo urdhër nga Trump, raporton BBC.
Në Lindjen e Mesme është vërejtur një grumbullim i madh forcash amerikane. Dy grupe sulmues të udhëhequra nga aeroplanmbajtëset USS Nimitz dhe USS Carl Vinson po bashkohen në Gjirin Persik, ndërsa fluturime të avionëve luftarakë F-22 dhe F-35 janë vërejtur në lëvizje nga Evropa.
Në Washington, Sekretari i Shtetit, Marco Rubio do të takohet me Sekretarin e Jashtëm britanik, David Lammy për bisedime që pritet të përqendrohen në situatën me Iranin. Megjithatë, deri tani SHBA-ja nuk ka kërkuar përdorimin e bazave ushtarake britanike në Diego Garcia ose Qipro për operacione kundër Iranit.
Ambasada amerikane në Jerusalem lëshoi një plan evakuimi për qytetarët amerikanë në Izrael, megjithëse nuk është e qartë sa amerikanë do të largohen dhe nëse do të ketë ndihmë ushtarake për fluturimet e evakuimit.
Që nga nisja e sulmeve të premten, sipas grupit Human Rights Activists me seli në Uashington DC, sulmet izraelite ndaj Iranit kanë shkaktuar vdekjen e 585 personave, përfshirë 239 civilë dhe 126 persona të sigurisë.
Në hakmarrje, Irani ka qëlluar rreth 400 raketa drejt Izraelit, duke vrarë 24 civilë sipas autoriteteve izraelite. Situata mbetet tepër e tensionuar dhe me rrezik për përshkallëzim të mëtejshëm në rajon.
