Kryeministri kanadez, Mark Carney ka thënë se tarifat e automobilave të vendosura nga presidenti amerikan, Donald Trump janë një “sulm i drejtpërdrejtë” ndaj vendit të tij.
Kjo vjen pasi Trump të mërkuren tha se do vendoste tarifa prej 25% për importet e automjeteve, dhe këtë tarifë e nënvizoi si “të përhershmë”.
“Ky është një sulm shumë i drejtpërdrejtë,” u përgjigj Carney. “Ne do të mbrojmë punëtorët tanë. Ne do të mbrojmë kompanitë tona. Ne do të mbrojmë vendin tonë.”
Ai nuk u përgjigj menjëherë se a do të marr masa hakmarrëse pasi që tha se fillimisht i duhet të dijë detajet e urdhërit ekzekutiv të vendosur nga Trump, raporton AP.
Rritja e taksave për importet e makinave duke filluar në prill do të thotë që prodhuesit e automjeteve mund të përballen me kosto më të larta dhe shitje më të ulëta.
Automjetet janë eksporti i dytë më i madh i Kanadasë. Carney vuri në dukje se sektori punëson 125,000 kanadezë drejtpërdrejt dhe pothuajse 500,000 të tjerë në industritë e lidhura.
Kryeministri i Ontarios, Doug Ford, provinca e të cilit ka pjesën më të madhe të industrisë së automobilave të Kanadasë, tha se fabrikat e automobilave në të dy anët e kufirit do të mbyllen njëkohësisht nëse tarifat vazhdojnë.
Trump i ka shpallur një luftë tregtare fqinjit të tij verior dhe vazhdon të kërkojë që Kanadaja të bëhet shteti i 51-të, një pozicion që ka zemëruar kanadezët.
