Presidenti i SHBA-së, Donald Trump ka postuar në llogarinë e tij në Truth Social, duke i nxitur kanadezët të votojnë për t’u bërë “Shteti i 51-të i dashur i Shteteve të Bashkuara të Amerikës”.
Ai bëri thirrje për t’i dhënë fund një “vije të tërhequr artificialisht nga shumë vite më parë”, duke shtuar: “Shikoni sa e bukur do të ishte kjo masë tokësore”.
Ai gjithashtu thotë se Amerika “nuk mund të subvencionojë më Kanadanë me qindra miliarda dollarë në vit që ne kemi shpenzuar në të kaluarën” nëse nuk është një shtet i SHBA.
Thirrjet vinë teksa janë hapur vendvotimet në tërë Kanadanë që nga mëngjesi i së hënës, për të zgjedhur qeverinë e re, pasi që vendi shkoi në zgjedhje të parakohshme. Vendvotimet janë planifikuar të mbyllen në orën 22:00 me orën lokale.
Pas deklaratës së Trumpit, udhëheqësi i Partisë Konservatore, Pierre Poilievre, njëri nga kandidatët për kryeministër, i tha Trumpit të “qëndronte jashtë zgjedhjeve tona”, duke shtuar se Kanadaja “Kurrë nuk do të jetë shteti i 51-të”, raporton BBC.
Ndryshe nga SHBA-të, fletët e votimit të Kanadasë numërohen me dorë nga punëtorët zgjedhorë me pagesë para dëshmitarëve.
Makinat e votimit nuk përdoren për numërim në Kanada dhe numërimi fillon me mbylljen e qendrave të votimit.
Rezultatet e disponueshme natën e zgjedhjeve janë paraprake dhe vërtetohen në ditët pas zgjedhjeve, më pas publikohen në internet.
