Presidenti amerikan, Donald Trump ka thënë se do nxisë qeverinë e tij të rihapë dhe zgjerojë Alkatrazin, ish-burgun famëkeq në një ishull të vështirë për t’u arritur në Kaliforni pranë San Franciskos, i cili ka qenë i mbyllur për më shumë se 60 vjet.
Në një postim në faqen e tij të Truth Social të dielën në mbrëmje, Trump shkroi se, “Për një kohë shumë të gjatë, Amerika është pllakosur nga shkelës të egër, të dhunshëm dhe të përsëritur të krimeve, mbeturinat e shoqërisë, të cilët nuk do të kontribuojnë kurrë asgjë tjetër përveç mjerimit dhe vuajtjes”, raporton AP.
Kur ishim një komb më serioz, në të kaluarën, nuk hezitonim t’i burgosnim kriminelët më të rrezikshëm dhe t’i mbanim larg kujtdo që mund të dëmtonin. Kështu duhet të jetë.”
“Kjo është arsyeja pse, sot,” tha ai, “po i drejtoj Byrosë së Burgjeve, së bashku me Departamentin e Drejtësisë, FBI-në dhe Sigurinë Kombëtare, që të rihapin një ALkATRAZ të zgjeruar dhe të rindërtuar në mënyrë të konsiderueshme, për të strehuar shkelësit më të pamëshirshëm dhe të dhunshëm të Amerikës.”
Burgu u mbyll në vitin 1963 për shkak të infrastrukturës së rrënuar dhe kostove të larta të riparimit dhe furnizimit të objektit të ishullit, sepse gjithçka, nga karburanti te ushqimi, duhej të sillej me anije.
Burgu — i njohur për faktin se ishte i pashmangshëm për t’u shpëtuar për shkak të rrymave të forta oqeanike dhe ujërave të ftohta të Paqësorit që e rrethojnë — njihej si “Shkëmbi” dhe strehonte disa nga kriminelët më famëkeq të vendit, përfshirë gangsterin Al Capone dhe George “Mitralioz” Kelly.
Trump ka urdhëruar gjithashtu hapjen e një qendre paraburgimi në Gjirin e Guantanamos, Kubë, për të mbajtur deri në 30,000 nga ata që ai i ka quajtur “të huajt më të këqij kriminelë”.
