Presidenti i SHBA-së, Donald Trump, nënshkroi urdhrin ekzekutiv për zgjatjen me 90 ditë ( deri më 10 nëntor) të tarifave doganore ndaj Kinës.
Trump e ka konsideruar të nevojshme dhe të përshtatshme ruajtjen e armëpushimit në luftën tregtare deri në nëntor, me zbatimin e tarifave “bazë” prej 10% për produktet e importuara kineze ndërkohë.
“Kina vazhdon të ndërmarrë hapa të rëndësishëm (…) për të adresuar shqetësimet e SHBA-së në lidhje me sigurinë (e tyre) ekonomike dhe kombëtare“, nënvizohet në tekstin e publikuar nga zyra e tij në Shtëpinë e Bardhë.
Pothuajse njëkohësisht, agjencia zyrtare kineze e lajmeve Xinhua transmetoi një deklaratë të përbashkët që buronte nga negociatat kino-amerikane në Stokholm, se edhe Pekini do zgjaste armëpushimin.
Kështu, Kina po vazhdon pezullimin që kishte njoftuar për rritjen e tarifave për 90 ditë nga 12 gushti, duke ruajtur gjithashtu, ashtu si pala tjetër, tarifat shtesë prej 10% për produktet e importuara amerikane, sipas të njëjtit burim.
Pasi u përfshinë në një konflikt të hidhur tregtar në pranverë, duke shkëmbyer breshëri tarifash penguese me tre shifra, Uashingtoni dhe Pekini arritën një armëpushim 90-ditor në maj në Gjenevë.
Përkohësisht, ajo marrëveshje vendosi tarifa shtesë amerikane për produktet kineze në 30% dhe tarifa kineze për produktet amerikane në 10%.
Më herët dje, Donald Trump deklaroi në Shtëpinë e Bardhë se negociatat tregtare të të dyja palëve po shkonin “mjaft mirë”.
