Presidenti i SHBA-së, Donald Trump, paralajmëroi për “pasoja shumë serioze” nëse Elon Musk mbështet financiarisht kandidatët demokratë që kundërshtojnë ligjin buxhetor të Partisë Republikane.
Në një intervistë telefonike për NBC News, Trump refuzoi të japë detaje për këto pasoja, por theksoi se nuk ka interes të përmirësojë marrëdhëniet me CEO-n e Teslës.
“Mendoj se marrëdhënia ka përfunduar,” tha Trump, duke shtuar se është “shumë i zënë me gjëra të tjera” dhe nuk ka ndërmend të flasë me Muskun.
Ai e akuzoi miliarderin për mungesë respekti ndaj presidencës dhe tha se një sjellje e tillë është “shumë e gabuar”.
Përplasja midis tyre u përshkallëzua pas komenteve kritike të Musk ndaj Trumpit në platformën X, përfshirë një postim të fshirë më vonë që i referohej lidhjeve të supozuara me Jeffrey Epstein – një pretendim që Trump e hodhi poshtë si “lajm i vjetër”.
Përplasja ndodhi pas kundërshtimit të Musk ndaj një mase republikane që, sipas tij, do të rrisë deficitin. Debati ka shkaktuar tension në Kongres dhe ndikim në tregjet financiare, përfshirë aksionet e Teslës.
